បន្ទាយមានជ័យ ៖ បុរសម្នាក់បានដេកស្លាប់យ៉ាងអាណោចអាធ័មក្នុងវាលស្រែ ក្នុងហេតុការណ៍គ្រោះថ្នាក់ចរាចរណ៍កើតឡើងនៅថ្ងៃទី២៦ ខែសីហា ឆ្នាំ២០១៩ ប្រហែលជាម៉ោង៤និង០៥នាទីទាបភ្លឺ លើកំណាត់ផ្លូវជាតិលេខ៦ ក្រៅទីប្រជុំជន ត្រង់ចំណុចបង្គោលខ្សែភ្លើងលេខ០១៤៦-០១៤៧ ដែលស្ថិតនៅលើគល់ស្ពានច្រេសខាងលិចក្នុងភូមិសាស្ត្រឃុំឈ្នួរមានជ័យ ស្រុកព្រះនេត្រព្រះ ខេត្តបន្ទាយមានជ័យ រវាងរថយន្តបុកជាមួយគោយន្តកន្ត្រៃ ។
លោកវរសេនីយ៍ឯក មាស ប្ញទ្ធី អធិការនគរបាលស្រុកព្រះនេត្រព្រះ បានឲ្យដឹងថា ៖ ជនរងគ្រោះ ត្រូវបានគេស្គាល់ឈ្មោះ សឿត ម៉ាប់ ភេទប្រុស អាយុ៤៦ឆ្នាំ នៅភូមិដូនល្វា ឃុំចាឈូក ស្រុកអង្គរជុំ ខេត្តសៀមរាប បើកបរគោយន្តកន្ត្រៃម៉ាក KUBOTA RT 140 ពណ៌ក្រហម រ៉ឺម៉កដែក ។
លោកអធិការបានបញ្ជាក់ ៖ បើតាមការត្រួតពិនិត្យរបស់សមត្ថកិច្ច នគរបាលជំនាញចរាចរណ៍ស្រុក មុនពេលកើតហេតុ គោយន្តកន្ត្រៃបានធ្វើដំណើរក្នុងទិសដៅពីកើតទៅលិច ដល់ចំណុចកើតហេតុលើគល់ស្ពានច្រេសខាងលិច មានរថយន្តមួយគ្រឿងមិនស្គាល់អត្តសញ្ញាណ បានបើកបរទិសខាងកើតទៅទិសខាងលិច ក្នុងទិសដៅស្របទិសគ្នា បានបុកចំពីក្រោយរ៉ឺម៉កគោយន្ត បណ្តាលឲ្យគោយន្តរេចង្កូតធ្លាក់ពីលើផ្លូវជាតិ បុកគល់ដើមអាកាស្យ៉ាដាច់កង់ខាងឆ្វេង ឯអ្នកបើកបរផ្លោងខ្ទាតទៅស្លាប់ក្នុងវាលស្រែ ។
ចំណែកអ្នកបើកបររថយន្តបានបើកគេចខ្លួនបាត់ បន្សល់ទុកតែប៉ាណាមុខរថយន្តមានអក្សរនីសសាន់ និងកង្ហារម៉ាស៊ីនរថយន្តនៅកន្លែងកើតហេតុ ។
លោកអធិការនគរបាលស្រុកព្រះនេត្រព្រះ បានបញ្ជាក់ថា ៖ ក្រោយពីធ្វើការត្រួតពិនិត្យរួច កម្លាំងនគរបាលជំនាញបានប្រគល់សពជូនក្រុមគ្រួសារ យកទៅចាត់ចែងធ្វើបុណ្យតាមប្រពៃណី ចំណែកគោយន្តកន្ត្រៃយកមករក្សាទុកនៅអធិការដ្ឋាន រងចាំប្រគល់ជូនក្រុមគ្រួសារផងដែរ៕
