ខេត្ដស្វាយរៀង៖ ប្រជាពលរដ្ឋ បានដាក់ការងឿងឆ្ងល់ថា តើផ្លូវបេតុងមួយខ្សែមានបណ្ដោយប្រវែង ០.២៩៣ គីឡូម៉ែត្រ ទទឹង ៥ម៉ែត្រ ស្ថិតនៅភូមិព្រៃធំ ឃុំព្រៃធំ ស្រុកកំពង់រោទិ៍ ខេត្តស្វាយរៀង ត្រូវតាមស្តង់ដាលក្ខណៈបច្ចេកទេសដែរឬទេ ព្រោះថា៖
១. ធ្វើផ្លូវបេតុង ក្រាលសរសៃដែកផ្ទាល់លើដី រួចចាក់ស៊ីម៉ង់ពីលើ ដោយពុំមានរៀបថ្មមិចនៅពីខាងក្រោមដីនោះទេ។
២. ផ្លូវបេតុងធ្វើកម្រាស់ ០,១០ម៉ែត្រ ត្រឹមត្រូវបានតែសងខាងផ្លូវ តែចំកណ្ដាលទ្រូងថ្នល់ ធ្វើរាងខ្នងអណ្ដើកខ្ពស់ហួសហេតុ បើគិតពីកម្រាស់នៅចំកណ្ដាល មិនបានគ្រប់ ០,១០ម៉ែត្រផងហ្នឹងទេដឹង។
ពលរដ្ឋបានលើកឡើងថា តើបច្ចេកទេសនៃការធ្វើផ្លូវបេតុង តម្រូវឲ្យធ្វើតាមលក្ខណៈបច្ចេកទេស ទាំងពីរចំណុចខាងលើ ឬយ៉ាងណា សូមអាជ្ញាធរពាក់ព័ន្ធទាំងអស់ មេត្តាជួយត្រួតពិនិត្យផង។
សូមរម្លឹកផងដែរថាគម្រោងដាក់ដេញថ្លៃកែរលម្អផ្លូវដីក្រាលមេតុងអាមេប្រវែង០.២៩៣ គីឡូម៉ែត្រ ទទឹង ៥ម៉ែត្រ ស្ថិតនៅភូមិព្រៃធំ ឃុំព្រៃធំ ស្រុកកំពង់រោទិ៍ ខេត្តស្វាយរៀង ដេញបានតម្លៃក្រោម ៥០% នៅសាលាឃុំព្រៃធំ ស្រុកកំពង់រោទិ៍ ខេត្តស្វាយរៀង ។
ក្នុងការដាក់ដេញថ្លៃ មានក្រុមហ៊ុនចំនួន៩ក្រុមហ៊ុន បានចូលដាក់ដេញថ្លៃ ហើយការចូលដាក់ដេញថ្លៃនោះ គឺបានដេញបញ្ចុះតម្លៃទាប ដោយគម្រោងប៉ាន់ស្មាន ១៨៧,៨៧៩,៨០០ រៀល ហើយតម្លៃដែលដេញថ្លៃបាន ក្នុងតម្លៃទាបជាងគេ អាចទទួលយកបានគឺ៖ ៦៩,១៤៨,០០០ រៀល របស់ក្រុមហ៊ុន សុខ គន្ធា ជាអ្នកទទួលការសាងសង់ ។
ពលរដ្ឋស្នើរសុំអោយមន្ត្រីជំនាញចុះត្រួតពិនិត្យ និងតាមដានអោយបានជាប់ជាប្រចាំផង ដើម្បីកុំអោយក្រុមហ៊ុនដែលទទួលបានគម្រោងធ្វើមិនបាន និងធ្វើមិនត្រូវតាមស្តង់ដាបច្ចេកទេស និងមិនមានគុណភាព តាមកិច្ចសន្យានៃគម្រោង។
ពលដ្ឋរស្នើរដល់ម្ចាស់គម្រោងនិងមន្ត្រីបច្ចេកទេស មន្ត្រីលទ្ធកម្មមេត្តាបង្កើតគណកម្មការវាយតម្លៃគុណភាពផ្លូវឲ្យបានម៉ត់ចត់ត្រូវតាមស្តង់ដានៃគម្រោង ជៀសវាងផ្លូវគ្មានគុណភាព ធ្វើហើយធ្វើទៀត ជួសជុលហើយផ្លូវខូចដដែលៗ ៕
