ខេត្តតាកែវ៖ ថ្ងៃទី១១ ខែមិថុនា ឆ្នាំ២០១៩ វេលាម៉ោង១៨ និង១៥នាទី ស្ថិតនៅលើផ្លូវលេខ១៣២ ចន្លោះគីឡូម៉ែត្រលេខ០៨ និងលេខ០៩ ក្នុងភូមិទីប៉ាត់ ឃុំជាងទង ស្រុកត្រាំកក់ ខេត្តតាកែវ មានករណីគ្រោះថ្នាក់ចរាចរណ៍បង្ករអោយមានអគ្គីភ័យមួយកើតឡើងរវាងរថយន្តនិងម៉ូតូបណ្ដាលឲ្យបុរសម្នាក់ស្លាប់បាត់បង់ជីវិតនៅនិងកន្លែង។
អធិការស្រុកត្រាំកក់ លោក ឌុក ធីយ៉ា បានអោយដឹងថា រថយន្តម៉ាកតូយ៉ូតាហាយឡែនឌ័រពណ៌ស ពាក់ស្លាកលេខតាកែវ2A-2257(អ្នកបើកបរគេចខ្លួនបាត់) បើកបរមកពីទិសខាងកើត លុះមកដល់ចំណុចខាងលើបានបុកម៉ូតូមួយគ្រឿងម៉ាកS L ពណ៌ខ្មៅ ពាក់ស្លាកលេខភ្នំពេញ1BB-8940 បើកបរដោយឈ្មោះ ចាន់ រតនា ភេទប្រុស អាយុ៣៧ឆ្នាំ នៅភូមិប្រកៀប ឃុំត្រពាំងធំខាងត្បូង ស្រុកត្រាំកក់ ខេត្តតាកែវ មុខរបរជាងជួសជុលម៉ូតូ(ស្លាប់នៅកន្លែងកើតហេតុ) មានឌុបគ្នាម្នាក់ឈ្មោះ លី ណន ភេទប្រុស អាយុ៣៥ឆ្នាំ នៅភូមិឃុំជាមួយគ្នា មុខរបរកសិករ(រងរបួសធ្ងន់) បើកបរមកពីទិសខាងលិច។
ក្រោយពេលបុកជាមួយរថយន្តខាងលើ ត្រូវបានឆេះរថយន្តយ៉ាងសន្ធសន្ធៅ ហើយកម្លាំងជំនាញរបស់អធិការដ្ឋាននគរបាលស្រុកត្រាំកក់ បានប្រើប្រាស់រថយន្តពន្លត់អគ្គីភ័យអស់ចំនួន០១គ្រឿង ទើបស្ថានភាពអគ្គីភ័យបានរលត់ជាស្ថាពរ១០០%។
ក្រោយពីសមត្ថកិច្ចធ្វើការវាស់វែងរួច មធ្យោបាយខាងលើ ត្រូវបានយកមករក្សាទុកនៅអធិការដ្ឋាននគរបាលស្រុកត្រាំកក់។
ចំណែកជនរងគ្រោះបានបញ្ជូនទៅសង្គ្រោះនៅមន្ទីរពេទ្យបង្អែកក្រុងដូនកែវ រីឯសាកសពប្រគល់ជូនសាច់ញ្ញាតិយកទៅធ្វើបុណ្យតាមប្រពៃណី។ កម្លាំងជំនាញបានអោយដឹងទៀតថា កម្លាំងយើងកំពុងនិងស្រាវជ្រាវរកភាគីម្ចាស់រថយន្តចូលខ្លួនមកដោះស្រាយគ្នានៅពេលក្រោយ៕
