ភ្នំពេញ ៖ លោក ឃួង ស្រេង អភិបាលរាជធានីភ្នំពេញ បានលើកឡើងថា ការដាក់កម្មករ-កម្មការិនី ដែលត្រឡប់មកពីស្រុកកំណើត នាឱកាសបុណ្យចូលឆ្នាំថ្មី ប្រពៃណីជាតិខ្មែរ ឱ្យនៅដាច់ដោយឡែកពីគេរយៈពេល ១៤ថ្ងៃ គឺធ្វើឡើងដើម្បីសុខមាលភាពរបស់កម្មករ-កម្មការិនីទាំងដែលបម្រើការនៅតាមរោងចក្រទាំងអស់គ្នា។
លោក ឃួង ស្រេង បានលើកឡើងបែបនេះ ក្នុងឱកាសចុះពិនត្យទីតាំង៣កន្លែង ដាក់កម្មករ-កម្មាការិនី នារសៀលថ្ងៃទី១៩ ខែមេសា ឆ្នាំ២០២០នេះ នៅក្នុងឱកាសដែលលោក និងមន្ទីរសុខាភិបាលរាជធានី ចុះពិនិត្យមណ្ឌលត្រួតពិនិត្យសុខភាពបណ្តោះអាសន្ន នៅវិទ្យាល័យជម្ពូវ័ន្ត, អនុវិទ្យាល័យគោកបញ្ជាន់ និងវិទ្យាល័យឫស្សីកែវ រាជធានីភ្នំពេញ ដែលជាទីសម្រាប់ត្រៀមដាក់កម្មករឱ្យនៅដាច់ ដោយឡែក ក្នុងនោះវិទ្យាល័យជម្ពូវ័ន្ត មានចំនួន៥០បន្ទប់, អនុវិទ្យាល័យគោកបញ្ជាន់ ចំនួន៣៩បន្ទប់ និងវិទ្យាល័យប្ញស្សីកែវ ចំនួន៤៩បន្ទប់ ដោយ១បន្ទប់ ដាក់មនុស្ស២នាក់ប៉ុណ្ណោះ។
លោក ឃួង ស្រេង បានបញ្ជាក់ថា ក្នុងនាមអាជ្ញាធរដែនដី ក៏ដូចជារាជរដ្ឋាភិបាល យើងអត់យកទោសពៃអីទេ ការដាក់ឱ្យកម្មករ-កម្មការិនី ដែលត្រឡប់មកពីស្រុកកំណើតដាក់ ឱ្យនៅដាច់ដោយឡែករយៈពេល១៤ថ្ងៃ តាមការណែនាំរបស់ក្រសួងសុខាភិបាល គឺធ្វើឡើងដើម្បីសុខមាលភាពរបស់ប្រជាពលរដ្ឋ កម្មករ-កម្មការិនីទាំងអស់គ្នា។
លោក ឃួង ស្រេង ក៏បានលើកឡើងឧទាហរណ៍ថា ប្រសិនបើអាជ្ញាធរមិនចាត់វិធានការបែបនេះទេ ប្រសិនបើមានកម្មករ កម្មការិនីណាម្នាក់មានផ្ទុកវីរុស COVID-19 អាចនឹងចម្លងដល់អ្នកដទៃ ព្រមទាំងអាចឱ្យរោងចក្រទាំងមូលប្រឈមមុខនឹងការបិទទ្វាររោងចក្រតែម្តង។ ដូច្នេះ ការអនុវត្តតាមវិធានការណ៍ណែនាំរបស់ក្រសួងការងារ គឺដើម្បីធ្វើយ៉ាងធានាដល់សុខមាលភាពរបស់កម្មករ កម្មការិនីទាំងអស់គ្នាផងដែរ។
លោក ឃួង ស្រេង បានបន្ដថា ការដឹកនាំរបស់សម្តេចតេជោ ហ៊ុន សែន ក្នុងការទប់ស្កាត់ ប្រយុទ្ធប្រឆាំងនឹងជំងឺ COVID-19 នេះនឹងទទួលបានជោគ ជ័យ តាមរយៈការដាក់ចេញនូវវិធានការច្បាស់លាស់ ម៉ឹងម៉ាត ជាពិសេសនៅតាមបណ្តារាជធានី-ខេត្ត គឺមានគណៈកម្មការទទួលខុសត្រូវលើជំងឺនេះតាំងពីថ្នាក់ជាតិ រហូតដល់ថ្នាក់ក្រោមជាតិ។
សូមបញ្ជាក់ថា នាថ្ងៃទី១៥ ខែមេសា ឆ្នាំ២០២០ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានស្នើក្រសួងការងារ និងបណ្តុះបណ្តាលវិជ្ជាជីវៈ សហការជាមួយរោងចក្រ សហគ្រាស និងក្រុមហ៊ុននានា ដាក់កម្មករ និយោជិត ដែលទៅស្រុកលេងចូលឆ្នាំរយៈពេល១៤ថ្ងៃ មុនឱ្យពួកគេចូលធ្វើការវិញ ដើម្បីបង្ការការចម្លងជំងឺកូវីដ-១៩។ ដោយឡែកកម្មករ និយោជិត ដែលត្រឡប់មកពីចូលឆ្នាំវិញ ត្រូវតែដាក់ឱ្យនៅដាច់ដោយឡែកជាចាំបាច់ ហើយត្រូវតាមដានសុខភាពជាប្រចាំ។
លោក ម៉ម ប៊ុនហេង បានគូសបញ្ជាក់ថា វិធានការនេះធ្វើឡើង ដើម្បីកុំឱ្យមានការចម្លងរាតត្បាតជំងឺកូវីដ-១៩ ចូលក្នុងសហគមន៍។ ជាពិសេសការធ្វើដំណើរចល័ត របស់បុគ្គលពីកន្លែងមួយទៅកន្លែងមួយដែលមិនបានគោរពតាមបទបញ្ជារបស់សម្ដេចតេជោនាយករដ្ឋមន្ត្រី នាឱកាសបុណ្យចូលឆ្នាំប្រពៃណីជាតិខ្មែរ ដែលមានការ សម្រុក ចេញទៅស្រុកកំណើត។
រយៈពេល ១សប្តាហ៍មកហើយ ចាប់តាំងពីថ្ងៃទី១៣ ខែមេសា ឆ្នាំ២០២០ មកទល់នឹងពេលនេះ មិនមានករណីឆ្លងថ្មី នៃជំងឺកូវីដ-១៩ នៅក្នុងប្រទេសកម្ពុជាទេ ខណៈដែលអ្នកជំងឺកូវីដ-១៩ ដែលបានជាសះស្បើយនៅកម្ពុជា បានកើនឡើងជាបន្តបន្ទាប់។
សេចក្តីប្រកាសព័ត៌មានរបស់ក្រសួងសុខាភិបាល បានឱ្យដឹងថា គិតត្រឹមថ្ងៃទី១៩ ខែមេសា ឆ្នាំ២០២០នេះ ករណីជំងឺកូវីដ-១៩ នៅក្នុងប្រទេសកម្ពុជា មានត្រឹម ១២២ករណីដដែល ខណៈដែលអ្នកជាសះស្បើយ កើនដល់១០៥នាក់ នៅទូទាំងប្រទេស និងមានអ្នកជំងឺប្រមាណ១៧នាក់ប៉ុណ្ណោះ កំពុងបន្តសម្រាកព្យាបាលនៅមន្ទីរពេទ្យ៕
