កំពង់ចាម៖ ឯកឧត្តម អ៊ុន ចាន់ដា អភិបាលខេត្តកំពង់ចាម និងឯកឧត្តម ខ្លូត ផន ប្រធានក្រុមប្រឹក្សាខេត្ត អមដំណើរដោយថ្នាក់ដឹកនាំ មន្ទីរអង្គភាពពាក់ព័ន្ធជុំវិញខេត្ត និងអាជ្ញាធរមូលដ្ឋាន នាព្រឹកថ្ងៃទី១៤ ខែឧសភា ឆ្នាំ២០២០នេះ បានអញ្ជើញចូលរួមចែកកញ្ចប់អាហារស្រាយបួសរ៉ាម៉ាឌន ជូនដល់បងប្អូនប្រជាពលរដ្ឋសាសនិកខ្មែរឥស្លាម ដែលជួបការលំបាកក្នុងជីវភាព ចំនួន៤៦០គ្រួសារ នៅក្នុងភូមិទី១៣ ឃុំកោះសូទិន ស្រុកកោះសូទិន ខេត្តកំពង់ចាម។
ដោយក្នុងមួយគ្រូសារទទួលបាន អង្ករ១០គីឡូ និងគ្រឿងឧបភោគបរិភោគមួយចំនួន មានដូចជា ស្ករសរ ទឹកដោះគោ ប្រេងឆា និងទឹកសេរ៉ូ ផងដែរ។
ថ្លែងក្នុងពិធីសំណេះសំណាលនោះ ឯកឧត្ដម អ៊ុន ចាន់ដា អភិបាលខេត្តកំពង់ចាម បានលេីកឡើងថា កម្ពុជាមានសុខសន្តិភាព ស្ថិរភាពពេញលេញលេីផ្ទៃប្រទេស និងមានការអភិវឌ្ឍន៍រីកចម្រើនជាបន្តបន្ទាប់ ក្រោមនយោបាយឈ្នះឈ្នះ ដែលបាននាំមកនូវការបង្រួបបង្រួមជាតិ ពីសំណាក់សម្តេច តេជោ ហ៊ុន សែន ប្រមុខរាជរដ្ឋាភិបាលកម្ពុជា ដូច្នេះសូមឲ្យបងប្អូនប្រជាពលរដ្ឋ ចូលរួមចំណែកថែរក្សាសុខសន្តិភាពមួយនេះ ឲ្យបានគង់វង្ស ដេីម្បីបន្តការអភិវឌ្ឍន៍ប្រទេសជាតិយើង ឲ្យកាន់តែមានការរីកចម្រើនទៅមុខផងដែរ។
ជាមួយគ្នានោះ ឯកឧត្តមអភិបាលខេត្ត បានថ្លែងបន្តថា ចំពោះអ្នកជំងឺកូវីដ១៩ នៅក្នុងខេត្តកំពង់ចាម ដែលមានចំនួន១៦នាក់ ត្រូវបានព្យាបាលជាសះស្បើយអស់ហើយ ដោយឡែកអ្នកជំងឺ ក្នុងប្រទេសកម្ពុជាទាំងមូល ដែលមានចំនួន១២២នាក់ ក៏បានព្យាបាលជាសះស្បើយ ចំនួន១២០នាក់ ហើយដែរ ទោះជាយ៉ាងនេះក្តី យើងនៅតែមានក្តីព្រួយបារម្ភ ព្រោះជំងឺដ៏កាចសាហាវមួយនេះ ដែលមិនទាន់ទៅណាឆ្ងាយពីយេីងនៅឡេីយទេ បេីយេីងមានការធ្វេសប្រហែសតែបន្តិចនោះ នឹងមានហានិភ័យខ្ពស់ណាស់ ក្នុងការចម្លងវីរុសនេះ ពីបុគ្គលម្នាក់ទៅបុគ្គលម្នាក់ទៀត ក្នុងរលកទី២ ដូចនៅបណ្តាប្រទេសលើពិភពលោក ដែលនឹងអាចធ្លាក់ចូលទៅក្នុងសភាពធ្ងន់ធ្ងរជាមិនខាន ដូច្នេះសូមឲ្យអាជ្ញាធរគ្រប់មូលដ្ឋាន នៅតែបន្តធ្វើការផ្សព្វផ្សាយសារអប់រំ អំពីវិធានការបង្ការទប់ស្កាត់ការឆ្លងរីករាលដាលនៃជំងឺកូវីដ១៩នេះជាបន្តទៀត ដេីម្បីឲ្យបងប្អូនប្រជាពលរដ្ឋយើង បន្តការអនុវត្តគម្លាតសុវត្ថិភាពបុគ្គល និងគម្លាតសុវត្ថិភាពសង្គម និងប្រេីប្រាស់ម៉ាស់ ព្រមទាំងធ្វើអនាម័យជាប្រចាំ ឲ្យបានគ្រប់ៗគ្នា ស្របតាមការណែនាំរបស់ក្រសួងសុខាភិបាល ផងដែរ ៕
