ក្រុងប៉ោយប៉ែត ៖ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានដឹកនាំមន្ត្រី អាជ្ញាធរ មូលដ្ឋាន រៀបចំពិធី ចែកអំណោយមនុស្សធម៌ដ៏ថ្លៃថ្លារបស់ឯកឧត្តម ឧបនាយករដ្ឋមន្ត្រី កែ គឹមយ៉ាន និងលោកជំទាវ ឧកញ៉ា ហេមចិត្តាមហាឧបាសិកាពុទ្ធសាសនូបត្ថម្ភក៍ ម៉ៅ ម៉ាល័យ កែគឹមយ៉ាន និងសប្បុរសជន ដល់ប្រជាពលរដ្ឋដែលមានជីវភាពខ្វះខាតខ្លាំង និងជាជនងាយរងគ្រោះ ជនពិការ ចំនួន ៦០គ្រួសារ នៅសាលាក្រុងប៉ោយប៉ែត ស្ថិតក្នុងភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ នៅល្ងាចថ្ងៃសុក្រ ៩រោច ខែពិសាខ ឆ្នាំជូត ទោស័ក ព.ស.២៥៦៤ ត្រូវនឹង ថ្ងៃទី១៥ ខែឧសភា ឆ្នាំ២០២០ ក្នុងស្ថានភាពបង្ការ និងទប់ស្កាត់នៃការរាតត្បាតដោយវីរុសកូវីដ-១៩ ។
ថ្លែងក្នុងពិធីចែកអំណោយ នេះ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានថ្លែងអំណរគុណយ៉ាងជ្រាលជ្រៅបំផុតចំពោះអំណោយដ៏ថ្លៃថ្លារបស់ឯកឧត្តម ឧបនាយករដ្ឋមន្ត្រី កែ គឹមយ៉ាន និងលោកជំទាវ ឧកញ៉ា ហេមចិត្តាមហាឧបាសិកាពុទ្ធសាសនូបត្ថម្ភក៍ ម៉ៅ ម៉ាល័យ កែគឹមយ៉ាន និងសប្បុរសជនដែលមានសមានចិត្តសប្បុរសចូលរួមជាមួយនឹងសកម្មភាពមនុស្សធម៌របស់រដ្ឋបាលក្រុងនាពេលនេះ។ ដោយសកម្មភាពនេះចាត់ទុកថាបានចូលរួមចំពេលក្នុងស្ថានភាពនៃការរាតត្បាតរបស់វីរុសកូវីដ-១៩ បណ្តាលឱ្យបងប្អូនប្រជាពលរដ្ឋមួយចំនួនក្នុងមូលដ្ឋានជួបការខ្វះខាតស្បៀងប្រចាំថ្ងៃ។ ក្នុងឱកាសនោះ លោកអភិបាលក្រុង បានសង្កត់ធ្ងន់ថា ក្នុងនាមរាជរដ្ឋាភិបាលកម្ពុជា និងរដ្ឋបាលខេត្តបន្ទាយមានជ័យ និងក្នុងនាមរដ្ឋបាលក្រុងប៉ោយប៉ែត ខ្ញុំបាទ (គាត ហ៊ុល) តាំងចិត្តយ៉ាងមុតមាំថា “ដាច់ខាតមិនទុកចោលបងប្អូនប្រជាពលរដ្ឋណាម្នាក់ ដាច់ពោះស្លាប់ដោយសារអត់អាហារនោះឡើយ”។
នៅក្នុងឱកាសចែក អំណោយមនុស្សធម៌ ជាគ្រឿងឧបភោគនិងគ្រឿងបរិភោគ នេះផងដែរ ក្រុមការងាររដ្ឋបាលក្រុងប៉ោយប៉ែត បានធ្វើការចែកម៉ាសជូនបងប្អូនប្រជាពលរដ្ឋទាំងអស់ដែលបានមកទទួលអំណោយយ៉ាងយកចិត្តទុកដាក់ និងការទទួលខុសត្រូវខ្ពស់ ជាពិសេសនោះ បានរៀបចំជូនពួកគាត់ (ប្រជាពលរដ្ឋ) នូវកន្លែងអង្គុយស្ថិតក្នុងគម្លាតសុវត្ថិភាពឆ្ងាយៗពីគ្នា ប្រហែលជាជិតពីម៉ែត្រ ដើម្បីជាចំណែកចូលរួម ទប់ស្កាត់ការចម្លងជំងឺរាត្បាត កូវីដ-១៩ (COVID-19)។
ជាមួយគ្នានោះ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត និងជាសមាជិកគណៈកម្មការប្រយុទ្ឋនឹងជំងឺកូវីដ-១៩ ខេត្តបន្ទាយមានជ័យ បានក្រើនរម្លឹកចំពោះបងប្អូនប្រជាពលរដ្ឋសូមកុំភ្លេចខ្លួនបាត់បង់នូវការប្រុងប្រយ័ត្នក្នុងការការពារខ្លួនពីការចម្លងជំងឺកូវីដ-១៩ ដែលកត្តានេះគឺជាហានិភ័យខ្ពស់ក្នុងការបើកផ្លូវសម្រាប់ការរាតត្បាតនៃវីរុសកូវីដ-១៩ នៅក្នុងមូលដ្ឋានក្រុងប៉ោយប៉ែត ខេត្តបន្ទាយមានជ័យ។
លោកអភិបាលក្រុងប៉ោយប៉ែត បានសង្កាត់ធ្ងន់ថា ក្នុងកាលៈទេសៈនេះគឺជាដំណាក់កាលផុយស្រួយបំផុត ដែលយើងទាំងអស់គ្នាចាំបាច់ត្រូវតែមានការប្រុងប្រយ័ត្នជាប់ជានិច្ច និងមិនត្រូវភ្លេចទេថា វីរុសកូវីដ-១៩ នៅតែមានចរាចរ និងអាចចម្លងពីមនុស្សម្នាក់ទៅមនុស្សម្នាក់ទៀតបានដោយងាយស្រួល និងលឿនជាទីបំផុតដោយមិនដឹងខ្លួនតាមផ្លូវធ្វើដំណើរ ទីដែលមានមនុស្សជួបជុំច្រើន ក្នុងផ្សារ និងការចល័តរបស់មនុស្ស ប្រសិនបើបុគ្គលម្នាក់ៗ មិនបានប្រុងប្រយ័ត្នការពារខ្លួនឱ្យបានខ្ជាប់ខ្ជួនទៅតាមការណែនាំរបស់ក្រសួងសុខាភិបាល និងបទបញ្ជារបស់រាជរដ្ឋាភិបាលកម្ពុជា ៕ដោយលោក ចាន់ ពុធ
