រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បានឱ្យដឹងថា រាជរដ្ឋាភិបាលកម្ពុជា មានបំណង ប្រែក្លាយតំបន់អភិរក្សដែលមាននាបច្ចុប្បន្ននេះ ឱ្យទៅជាតំបន់ទេសចរណ៍ធម្មជាតិ ដើម្បីឆ្លើយតប នឹង កំណើន នៃការកើនឡើង នៃវិស័យទេសចរណ៍ និងតម្រូវការ របស់ប្រជាពលរដ្ឋ នៅក្នុងការដើរកម្សាន្តក្នុង ស្រុកនោះ។
លោក នេត្រ ភក្ត្រា រដ្ឋលេខាធិការក្រសួងបរិស្ថាន បានធ្វើឡើងបែបនេះ ក្នុងគ្រាដែលលោក ដឹកនាំក្រុមអ្នកសារព័ត៌មាន ដើរទស្សនាគម្រោងស្រូវមិត្តភាពសង្គ្រោះសត្វព្រៃ និងសហគមន៍អេកូ ទេសចរណ៍ នៅសហគមន៍ត្មាតប៉ើយ កាលពីរសៀលថ្ងៃទី០៩ ខែមិថុនា ឆ្នាំ២០២០ ម្សិលមិញនេះ។
បើតាម លោក នេត្រ ភក្ត្រា បច្ចុប្បន្ននេះ ទេសចរណ៍ក្នុងស្រុកមានកំណើន ឡើងគួរឱ្យកត់សម្គាល់ ដោយសារតែប្រជាពលរដ្ឋមានជីវភាព ធូរធារដោយសារតែកំណើន សេដ្ឋកិច្ចជាតិ និងសុខសន្តិភាពគ្រប ដណ្តប់ទូទាំងប្រទេស។ ក្នុងន័យនេះ ដើម្បីលើកកម្ពស់ប្រសិទ្ធភាព នៃការងារគ្រប់គ្រង និងអភិរក្ស ធនធាន ធម្មជាតិ និងជីវៈចម្រុះ សត្វព្រៃគ្រប់ប្រភេទ ក្រសួងបរិស្ថានបានរៀបចំ គោលនយោបាយ និង ផែនការ សកម្មភាព លើការបង្កើតសេដ្ឋកិច្ចរបស់ សហគមន៍ តំបន់ការពារធម្មជាតិដែលស្ថិត នៅក្នុងនិង ជុំវិញ តំបន់ការពារធម្មជាតិ ឱ្យមានជីវភាពធូរធារ។
លោកថា រាជរដ្ឋាភិបាលកម្ពុជា មានទិសដៅធ្វើយ៉ាងណាឱ្យសហគមន៍មានចំណូលបន្ថែម និងបង្កើតជម្រើសថ្មី សម្រាប់ការប្រកបមុខរបរ ចិញ្ចឹមជីវិត ដើម្បីកាត់ផ្តាច់ពីការពឹងអាស្រ័យលើអនុផល ព្រៃឈើ ដែលជាទម្លាប់មានពីយូរលង់ណាស់មកហើយ របស់ប្រជាពលរដ្ឋ នៅតាមសហគមន៍ មូលដ្ឋាន ដោយបង្កើតមុខរបរថ្មី បម្រើឱ្យវិស័យអេកូទេសចរណ៍ ព្រមទាំងការបណ្តុះបណ្តាល សហគមន៍ ឱ្យចេះ គ្រប់គ្រង និងការចិញ្ចឹមសត្វផ្គត់ផ្គង់ទីផ្សារ ការដាំដំណាំកសិកម្ម និងដំណាំរួមផ្សំផ្សេង ទៀតមាន បន្លែបង្កា សម្រាប់ប្រើប្រាស់ប្រចាំថ្ងៃខ្លួនឯងផង និងសម្រាប់បម្រើ សេវាកម្មដល់ភ្ញៀវទេសចរ ដែលទៅទស្សនា កម្សាន្ត នៅក្នុងតំបន់សហគមន៍របស់ពលរដ្ឋទៀតផង។
បើតាម លោក កែន សេរីរដ្ឋា នាយកអង្គការសមាគមន៍ អភិរក្សសត្វព្រៃ (WCS) ប្រចាំនៅកម្ពុជា បានឱ្យដឹងថា គម្រោងស្រូវសត្វត្រយ៉ង បានបង្ហាញនូវគោលបំណង ក្នុងការជំរុញ និងគាំទ្រសហគមន៍ មូលដ្ឋាន ដើម្បីធ្វើឱ្យប្រសើរឡើងនូវកម្រិតជីវភាព តាមការចង់បានរបស់ពួកគេ ជាមួយនឹងការសម្រេច បានគោលដៅ អភិរក្សក្នុងពេលតែមួយ គឺមានសារៈសំខាន់ ក្នុងការសម្រេចបានជោគជ័យ ក្នុងការងារ អភិរក្សសត្វត្រយ៉ង ហើយវាក៏ជាបញ្ហាមួយលំបាក នៅក្នុងការងារអភិរក្សអន្តរជាតិ ក្នុងការរួមបញ្ចូលគោល បំណងទាំងពីរនេះ។
លោកថា ដើម្បីឆ្លើយតប ទៅនឹងបញ្ហាខាងលើនេះ អង្គការសមាគមន៍អភិរក្សសត្វព្រៃ បាន បង្កើតអង្គការ ក្នុងស្រុកមួយឈ្មោះសន្សំម្លប់ព្រៃ(SMP)នៅក្នុងឆ្នាំ២០០៩ ដើម្បីផ្តល់ឱកាស ដល់កសិករ ក្នុងការទទួលបាន នូវតម្លៃបន្ថែមលើផលិតផលស្រូវ របស់ពួកគេដែលផលិតបាន តាមរយៈការប្តូ រ មកវិញ នូវការអនុវត្ត ផលិតកម្មស្រូវមិត្តភាពសង្រ្គោះសត្វព្រៃ។ ការអនុវត្តទាំងនេះរួមមាន៖ ការមិនកាប់ទន្រ្ទាន និងពង្រីកដីខុសច្បាប់ គោរពគោលការណ៍មិនបរបាញ់បរិភោគ និងជួញដូរសត្វព្រៃ និងអនុវត្តន៍ ផលិតកម្ម ស្រូវតាមស្តង់ដារសរីរាង្គ។
សព្វថ្ងៃផលិតផលស្រូវសត្វត្រយ៉ង ត្រូវបានគ្រប់គ្រង និងធ្វើអាជីវកម្មដោយ ក្រុមហ៊ុន Ibis Rice Conservati on Company (IRCC) កម្មសិទ្ធិ ដោយអង្គការសមាគមន៍អភិរក្ស សត្វព្រៃ ដែលទទួលខុសត្រូវក្នុងការទិញ និងលក់ផលិតផលស្រូវសត្វត្រយ៉ង។
កម្មវិធីស្រូវសត្វត្រយ៉ង កំពុងរីកលូតលាស់យ៉ាងឆាប់រហ័ស ចាប់ផ្តើមពី ២ភូមិ រហូតដល់សព្វថ្ងៃ កំពុង តែអនុវត្តន៍ក្នុង ១១ភូមិ នៅក្នុងតំបន់ការពារទេសភាព ភាគខាងជើង ប្រទេសកម្ពុជា (តំបន់ការពារ គូលែន ព្រហ្មទេពឆែប និងព្រៃព្រះរការ) ៥ភូមិជាប់ជាមួយព្រំប្រទល់ តំបន់ការពារសៀមប៉ាងភាគ ខាង លិច៣ភូមិ នៅក្នុងតំបន់ការពារកែវសីមា និង៣ភូមិ នៅក្នុងតំបន់ការពារព្រៃឡង់ ស្ថិតនៅក្នុងភូមិសាស្រ្ត ខេត្តស្ទឹងត្រែង៕
