ក្រុងប៉ោយប៉ែត ៖ នៅព្រឹក ថ្ងៃពុធ ៣ រោច ខែអាសាឍ ឆ្នាំជូតទោស័ក ពុទ្ធសករាជ ២៥៦៤ត្រូវនឹងថ្ងៃទី៨ ខែកក្កដា ឆ្នាំ២០២០ នេះ អាជ្ញាធរក្រុងប៉ោយប៉ែត បានរៀបចំ ពិធីចែកអំណោយ មនុស្សធម៌ ដល់ប្រជាពលរដ្ឋ ក្នុងក្រុងប៉ោយប៉ែត ក្រោមអធិបតីភាព លោក គាត ហ៊ុល អភិបាល នៃគណៈអភិបាល ក្រុងប៉ោយប៉ែត • លោក ហឺុរ៉ូសីុ អ៊ិតម៉ាត់សឺុ នាយកប្រតិបត្តិក្រុមហ៊ុនតំបន់សេដ្ឋកិច្ចពិសេស ប៉ោយប៉ែត ភី ភី និង លោក ណាកែវហ្គា ស៊ូ ស៊ូ មុ ក្រុមប្រឹក្សាភិបាលនៃក្រុមហ៊ុនតំបន់សេដ្ឋកិច្ចពិសេស ប៉ោយប៉ែត ភី ភី ព្រមទាំងមានការអញ្ជើញ ចូលរួម ពី លោក លោកស្រី ប្រធានការិយាល័យ ក្រុង • លោក វ៉ា ជឹមណារ៉េត ចៅសង្កាត់រងទី១ នៃសង្កាត់ប៉ោយប៉ែត ។
សូមបញ្ជាក់ថា ចាប់តាំងពីការរីករាលដាលនៃវីរុសកូវីដ១៩ មក រដ្ឋបាលក្រុងប៉ោយប៉ែត ក្រោមការដឹកនាំ របស់ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បាន សហការជាមួយរដ្ឋបាលសង្កាត់ និង មានការចូលរួមពីសប្បុរសជននៅគ្រប់ទិសទី រដ្ឋបាលក្រុង បានកៀរគរ ជាសម្ភារៈ ថវិកា ច្រើនសន្ធឹកសន្ធាប់ និង បានចែកជូនដល់បងប្អូនប្រជាពលរដ្ឋ ដែល មានជីវភាពខ្វះខាត បានចំនួនជិត ៨០០០ គ្រួសារ ( ជិតប្រាំបីពាន់គ្រួសារ) មកហើយ ទោះបីជា ខំចែកជូនយ៉ាងណាក្តី នៅតែមាន ប្រជាពលរដ្ឋជា ច្រើនគ្រួសារជួបប្រទះនឹងការខ្វះខាតបន្តទៀត។
ដូច្នេះ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានសូមអំពាវនាវដល់សប្បុរសជន ទាំងក្នុងនិងក្រៅប្រទេស មេត្តាជួយឧបត្ថម្ភជាសម្ភារៈ ថវិកាបន្ថែមទៀត ដើម្បីយកទៅចែកជូនបងប្អូនប្រជាពលរដ្ឋដែលកំពុងជួបប្រទះនឹងការខ្វះខាតនៅពេលក្រោយៗទៀត ។
ពិធីចែកអំណោយមនុស្សធម៌ ចំនួន៥០គ្រួសារ នាព្រឹកនេះ រដ្ឋបាលក្រុងប៉ោយប៉ែត ធ្វើឡើងបន្ទាប់ពី ប្រជាពលរដ្ឋ ដែលមានជីវភាពខ្វះខាត ស្មើរសុំ អំណោយ ដោយពួកគាត់បញ្ជាក់ថា ខ្វះស្បៀងអាហារ ក្នុងឱកាស ដែលអាជ្ញាធរ ក្រុងប៉ោយប៉ែត បានរៀបចំពិធី វរទិការ ផ្សព្វផ្សាយ និងពិគ្រោះយោបល់ របស់ក្រុមប្រឹក្សាក្រុង អាណត្តិទី៣ ឆ្នាំ២០២០ ដោយបានការឧបត្ថម្ភ អំណោយមនុស្សធម៌ ពី ក្រុមហ៊ុន ប៉ោយប៉ែត ភី ភី អេស អីហ្សិត ៕
