បន្ទាយមានជ័យ ៖ លោកជំទាវវេជ្ជបណ្ឌិត ឱ វណ្ណឌីន អ្នកនាំពាក្យ និងជារដ្ឋលេខាជិការក្រសួងសុខាភិបាលបានចុះមកស្វែងយល់ជុំវិញការអនុវត្តន៍បទបញ្ជារបស់រដ្ឋាភិបាល និងសេចក្តីណែនាំរបស់ក្រសួងសុខាភិបាលស្តីពីការទប់ស្កាត់ការរីករាលដាលជំងឺកូវីដ-១៩ ក្នុងខេត្តបន្ទាយមានជ័យ ។ពិធីនេះធ្វើឡើងនៅព្រឹកថ្ងៃទី៨ ខែកក្កដា ឆ្នាំ២០២០ នៅក្នុងសាលប្រជុំសាលាខេត្ត ដោយមានការចូលរួមឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងមន្ត្រីពាក់ព័ន្ធជាច្រើននាក់ ។
ក្នុងកិច្ចប្រជុំនោះលោកជំទាវ ឱ វណ្ណឌីន បានធ្វើការកោតសរសើរដល់អាជ្ញាធរខេត្តបន្ទាយមានជ័យ ក្នុងការបង្ការ ទប់ស្កាត់ការរីករាល់ដាលវីរុសកូវីដ-១៩ និងការអនុវត្តវិធានការរបស់ក្រសួងសុខាភិ បាលកន្លងមក ដែលបានដាក់ចេញវិធានការនានា និងមានកិច្ចសហការយ៉ាងល្អប្រសើរ ជាមួយនឹងភាគីថៃ ក្នុងការទទួលបងប្អូនពលករខ្មែរ ដែលភាគីថៃបានបញ្ជូនមកវិញតាមច្រកព្រំដែន ដោយមានការរៀបចំទីតាំងបានយ៉ាងល្អប្រសើរ និងមានប្រសិទ្ធភាព ។
លោកជំទាវបានបញ្ជាក់ឲ្យដឹងបន្តទៀតថា រឿងកូវីដ-១៩នេះ លោកជំទាវស្នើសុំឲ្យអាជ្ញាធរខេត្ត ត្រូវបន្តការប្រុងប្រយ័ត្ននិងផ្សព្វផ្សាយពីវិធានការទប់ស្កាត់ពីការចម្លងជំងឺនេះ ជាពិសេសករណីនាំចូលពីប្រទេសជិតខាង ក្នុងនោះក៏ត្រូវទប់ស្កាត់ការលួចឆ្លងដែនរបស់បងប្អូនពលករ ដើម្បីទៅរកការងារនៅប្រទេសថៃ ដែលវាជាហានីភ័យខ្ពស់ពីការឆ្លងកូវីដ-១៩នេះ។ក្នុងនោះលោកជំទាវក៏បានលើកឡើងថា៖ ខេត្តបន្ទាយមានជ័យជាខេត្តជាប់ព្រំដែន នៃប្រទេសថៃ ដែលជាក្តីព្រួយបារម្ភមួយ ដូច្នេះគឺទាមទារឲ្យអាជ្ញាធរត្រូវបង្កើនការទប់ស្កាត់ឲ្យបានខ្ពស់។ ចំពោះការធ្វើដំណើរចេញចូលទៅប្រទេសថៃព្រោះខេត្តបន្ទាយមានជ័យមានច្រករបៀងច្រើនពិបាកក្នុងការទប់ស្កាត់ ជាពិសេសបងប្អូនពលករលួចឆ្លងដែនទៅទឹកដីថៃ ដែលមកទល់ពេលនេះ មានពលករមកពីថៃជិត៧ម៉ឺននាក់ ដែលបានឆ្លងកាត់ការត្រួតពិនិត្យយ៉ាងយកចិត្តទុកដាក់ពីក្រុមការងារមុនពេលឲ្យចេញដំណើរត្រលប់ទៅមណ្ឌលចត្តាឡីស័ក ឬស្រុកកំណើតរបស់ខ្លួន វិញ។
ជាមួយគ្នានោះដែរ ឯកឧត្តម អ៊ុំ រាត្រីបានថ្លែងថា៖កន្លងមកអាជ្ញាធរខេត្តរួមនឹងអ្នកពាក់ព័ន្ធ គឺបានយកចិត្តទុកដាក់ និងដាក់ចេញនូវវិធានការផ្សេងៗ ក្នុងការទប់ស្កាត់ការរីករាលដាលពីការចម្លងកូវីដ-១៩ ហើយពលរដ្ឋមានការយល់ដឹង និងអនុវត្តបានយ៉ាងល្អប្រសើរជាមួយនឹងការដាក់ចេញនូវវិធានការរបស់អាជ្ញាធរ ។ ឯកឧត្តម អភិបាលខេត្តបន្តថា៖ រដ្ឋបាលខេត្តនឹងខិតខំអំពាវនាវឲ្យជួយគាំទ្រនូវប្រតិបត្តិការរបស់ក្រុមការងារសុខាភិបាល កងកម្លាំងដែលឈរជើងតាមគោលដៅនានា ពិសេសតាមបន្ទាត់ព្រំដែននិងបងប្អូនពលរដ្ឋក្នុងខេត្ត ត្រូវបន្តអនុវត្តនូវវិធានការដែលប្រមុខរាជរដ្ឋាភិបាល បានដាក់ចេញ និងអនុវត្តតាមការណែនាំរបស់ក្រសួងសុខាភិបាល ដោយអនុវត្តវិធានការអនាម័យលាងសម្អាតដៃជាមួយសាប៊ូ ទឹកស្អាត អាល់កុល ឬជែលជាពិសេសត្រូវពាក់ម៉ាក់ការពារពេលចេញធ្វើដំណើរតាមទីសាធារណៈផ្សេងៗ ៕
