ខេត្ដកំពង់ចាម៖នៅព្រឹកថ្ងៃសៅរ៍ទី២១ខែវិច្ឆិកា ឆ្នាំ២០២០ ឯកឧត្តម អ៊ុន ចាន់ដា អភិបាលខេត្តកំពង់ចាម អញ្ជើញដឹកនាំមន្ត្រីជំនាញ និងអាជ្ញាធរមូលដ្ឋាន ចុះពិនិត្យស្រែប្រាំងរបស់ប្រជាកសិករនៅភូមិតាំងត្រពាំង ឃុំល្វារ ស្រុកព្រៃឈរ បន្ទាប់ពីទទួលបានស្រូវពូជពីរដ្ឋាភិបាលកម្ពុជា កាលពីកំឡុងខែតុលា កន្លងមក។
គួរបញ្ជាក់ថា សម្រាប់ប្រជាកសិករនៅចំណុចទំនប់តាឡូតិ៍ ភូមិតាំងត្រពាំង ឃុំល្វារ គឺទទួលបានស្រូវពូជពីរាជរដ្ឋាភិបាលចំនួន១២០គ្រួសារ ដោយក្នុង១គ្រួសារៗ ទទួលបាន ១០០ គីឡូក្រាម នឹងកំពុងធ្វើការបង្កបង្កើនផលផ្ទៃដីទំហំ ៨០ហិកតា។
ដោយឡែកសម្រាប់ផ្ទៃដីបង្កបង្កើនផលស្រូវប្រាំងទូទាំងឃុំល្វារ មានផ្ទៃដីប្រមាណ ប្រហែល ២០០០ហិកតា។
បន្ទាប់ពីចុះពិនិត្យស្ថានភាពនៃការបង្ករបង្កើនផលស្រែប្រាំងរបស់ប្រជាកសិករនៅស្រុកព្រៃឈរ រួចមក ឯកឧត្តម អ៊ុនចាន់ដា អភិបាលខេត្តកំពង់ចាម អញ្ជើញដឹកនាំមន្ត្រីជំនាញ និងអាជ្ញាធរមូលដ្ឋាន បន្តចុះពិនិត្យមេីលការបង្ករបង្កើនផលស្រែប្រាំងរបស់ប្រជាកសិករនៅភូមិក្រដាសក ឃុំតាំងក្រសាំង ស្រុកបាធាយ បន្ទាប់ពីទទួលបានស្រូវពូជពីរាជរដ្ឋាភិបាលកម្ពុជា កាលពីកំឡុងខែតុលា កន្លងមក។
គួរបញ្ជាក់ថា សម្រាប់ប្រជាកសិករនៅភូមិ ក្រដាសក ឃុំតាំងក្រសាំង គឺទទួលបានស្រូវពូជពីរាជរដ្ឋាភិបាល ចំនួន៦១៤គ្រួសារ ដោយក្នុងមួយគ្រួសារៗ ទទួលបាន១០០ គីឡូក្រាម ដែលបាននឹងកំពុងធ្វើការបង្កបង្កើនផលលើទំហំផ្ទៃដីប្រមាណជាង២០០ហិកតា៕
