ភ្នំពេញ ៖ រថយន្តកុងតឺន័រមួយគ្រឿងបើកបរក្នុងល្បឿនលឿនជ្រុលទៅបុក រថយន្តឃ្លុបដឹកទំនិញមួយគ្រឿងពីក្រោយ បណ្តាលអោយរថយន្តដឹកទំនិញក្រឡាប់ដេកស្តូក ចំណែករថយន្តកុងតឺន័រនោះក៍បានជ្រុលឡើងសួនច្បារខណ្ឌចែក ទ្រូងផ្លូវ ។ ទោះបីជាយ៉ាងណា ពុំបណ្តាលអោយមនុស្សណាម្នាក់រងគ្រោះថ្នាក់ឡើយ ។
គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោងប្រមាណ៥និង៣០នាទីព្រឹកថ្ងៃទី១១ ខែធ្នូ ឆ្នាំ២០២០ លើមហាវិថីឈ្នះឈ្នះ ស្ថិតក្នុងភូមិកប់ស្រូវធំ សង្កាត់គោករកា ខណ្ឌព្រែកព្នៅ រាជធានីភ្នំពេញ។
រថយន្តកុងតឺន័រម៉ាកINTERNATION ពណ៌ស ពាក់ស្លាកលេខ ព្រះសីហនុ 3A-2500 បើកបរដោយឈ្មោះ ជិន បុល ភេទប្រុស អាយុ ២៨ឆ្នាំ ស្នាក់នៅភូមិថ្មី ឃុំត្រពាំងជង ស្រុកបាកាន ខេត្តពោធិ៍សាត់ ។ ចំណែករថយន្តដឹកទំនិញ ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 2AG-4917 ជារថយន្តឃ្លុបប្រហិត បើកបរដោយឈ្មោះ នាង ដារ៉ូ ភេទប្រុស អាយុ២៨ឆ្នាំ ស្នាក់នៅភូមិទួលខ្ជាយ ឃុំបរសេដ្ឋ ស្រុកបរសេដ្ឋ ខេត្តកំពង់ស្ពឺ ។
តាមប្រភពពីនគរបាលបានអោយដឹងថា គ្រោះថ្នាក់ខាងលើនេះ គឺបណ្តាលមកពីរថយន្ត កុងតឺន័របើកក្នុងល្បឿនលឿនមកបុករថយន្តដឹកប្រហិតពីក្រោយ បណ្តាលអោយក្រឡាប់តែម្តង ។
តាមប្រភពពីសាក្សីបានអោយដឹងថា នៅមុនពេលកើតហេតុ រថយន្តទាំង២គ្រឿង ធ្វើដំណើរក្នុងទិសដៅពីកើតទៅលិច ស្របទិសគ្នា លុះមកដល់កន្លែងកើតហេតុ រថយន្តកុងតឺន័រ ក៍បានជ្រុលទៅបុករថយន្តឃ្លុប បណ្តាលអោយក្រឡាប់ដេកស្តូក ចំណែករថយន្ត កុងតឺន័រក៍បានជ្រុលទៅបុកឡើងសួនច្បារខណ្ឌចែកទ្រូងផ្លូវ ។
ក្រោយពេលកើតហេតុ នគរបាលមូលដ្ឋាន ក៍បានចុះទៅដល់កន្លែងកើតហេតុ ទាក់ទងនគរបាលចរាចរណ៍ចុះមកវាស់វែងរួចបញ្ជូនរថយន្តទាំង២គ្រឿងទៅកាន់ការិយាល័យចរាចរណ៍ផ្លូវគោក ដើម្បីដោះស្រាយសង់ការខូចខាតរថយន្តទ្រព្យសម្បត្តិសាធារណៈ ៕
