ភ្នំពេញ ៖ នៅវេលាម៉ោង ៩នឹង០០ នាទីព្រឹក ថ្ងៃអង្គារ ៨កើត ខែបុស្ស ឆ្នាំជូត ទោស័ក ព.ស ២៥៦៤ ត្រូវនិងថ្ងៃទី ២២ ខែធ្នូ ឆ្នាំ២០២០នេះ លោក ឌី រ័ត្នខេមរុណ អភិបាលរង ខណ្ឌមានជ័យ អញ្ជើញដឹកនាំកិច្ចប្រជុំស្តីពីការពិនិត្យលទ្ធភាពរកទីតាំងសម្រាប់ប្រជាពលរដ្ឋទុកដាក់សំរាមសំណល់រឹង ដូចជាគ្រឿងសង្ហារឹមចាស់ៗ គ្រឿងអេឡិចត្រូនិកចាស់ៗខូច និងមែកឈើនៅតាមមូលដ្ឋានសង្កាត់នីមួយៗ នៃរដ្ឋបាលខណ្ឌមានជ័យ ។
👉 នាឱកាសនោះដែរ លោក ឌី រ័ត្នខេមរុណ អភិបាលរង ខណ្ឌមានជ័យ បានអោយសង្កាត់ទាំង៧ ធ្វើសេចក្ដីរាយការណ៍ អំពីការពិនិត្យរកទីតាំងទុកដាក់សំរាម សំណល់រឹង ជាក់លាក់ហើយជាដីរបស់រដ្ឋទំនេរ ដោយទុករយះពេល ២សប្តាហ៍ ត្រូវធ្វើរបាយការណ៍មកសាលាខណ្ឌមានជ័យ ដើម្បីសរុបជូនរាជធានីភ្នំពេញ ។
👉 បន្ទាប់មក លោក ឌី រ័ត្នខេមរុណ អភិបាលរង ខណ្ឌមានជ័យ បន្តទៀតថា
– ចំពោះសង្កាត់ណាដែលរកទីតាំងមិនបាន ក៍ត្រូវធ្វើរបាយការណ៍មកសាលាខណ្ឌមានជ័យដែរ ។
– ចំពោះសង្កាត់ណាដែលរកទីតាំងបានហើយត្រូវធ្វើប្លង់ទីតាំង ព្រមទាំងដាក់យាមការ ឲ្យបានច្បាស់លាស់ រួចផ្ញើមកសាលាខណ្ឌមានជ័យ ដើម្បីសាលាខណ្ឌមានជ័យ ធ្វើរបាយការណ៍ជូន សាលារាជធានីភ្នំពេញ សម្រេច និងបញ្ជូនទៅក្រសួងសេដ្ឋកិច្ច និងហិរញ្ញវត្ថុ ។
