ខេត្តព្រៃវែង៖ សង្វៀនជល់មាន់មួយកន្លែងកំពុងបើកលេងដោយរលូនមិនរំខានដល់អាជ្ញាធរនិងសមត្ថកិច្ចនៅស្រុកពោធិ៍រៀង ដែលមានទីតាំងស្ថិតនៅ ភូមិតាព្រះ ឃុំព្រែកតាសរ ស្រុកពោធិ៍រៀង ខេត្ដព្រៃវែង ដែលបណ្តោយក្រុមនាក់ញៀនល្បែងស៊ីសង ជល់មាន់ លេងបានយ៉ាងរលូន។
តាមប្រភពពីប្រជាពលរដ្ឋបាននិងក្រុមអ្នកញៀនល្បែងបានប្រាប់អោយដឹងថាម្ចាស់ សង្វៀនជល់មាន់គេមានខ្នងបង្អែកធំម្នាក់នៅក្នុងខេត្តព្រៃវែង ។
ប្រភពដដែលបានបន្តថាអ្នកលេងល្បែងគេតែងតែលេងស្រែកហ៊ោកញ្ជ្រៀវសើចលេងយ៉ាងសប្បាយរំពងហើយក៏មិនដែលឃើញសមត្ថកិច្ចចុះមកបង្ក្រាបទីតាំងសង្វៀនជល់មាន់នោះឡើយ។
ប្រជាពលរដ្ឋដាក់ការសង្ស័យថាសមត្ថកិច្ចក្នុងស្រុកប្រហែលខ្លាចអំណាចម្ចាស់សង្វៀននោះហើយបានជាបណ្ដែតបណ្ដោយបើកឲ្យលេងយ៉ាងរលូនបានយ៉ាងនេះ។
គួរបញ្ជាក់ថា ល្បែងស៊ីសងខុសច្បាប់ ត្រូវបានរាជរដ្ឋាភិបាលកម្ពុជា កំណត់ជាចំណុច ដែលត្រូវប្រយុទ្ធប្រឆាំង និងបង្ក្រាបឲ្យខានតែបាននៅក្នុងគោលនយោបាយភូមិ-ឃុំ មានសុវត្ថិភាព ដែលបានដាក់ចេញដោយក្រសួងមហាផ្ទៃ ដើម្បីឲ្យអាជ្ញាធរមូលដ្ឋានពាក់ព័ន្ធ អនុវត្តឲ្យមានប្រសិទ្ធភាព។
បើយោងតាមមាត្រា ៥នៃច្បាប់ស្តីពី ការបង្ក្រាបល្បែងស៊ីសង បានចែងថា អ្នកបើកកន្លែងលេងល្បែងស៊ីសង អ្នកកាន់កាប់ល្បែងស៊ីសង អ្នកចាត់ចែង និងភ្នាក់ងារស៊ីសង ត្រូវប្រឈមការផ្តន្ទាទោសដាក់ពន្ធនាគារពី ១ឆ្នាំ ទៅ ៥ឆ្នាំ។
ប្រជាពលរដ្ឋសម្តែងនូវក្តីបារម្មណ៍ ពីភាពអសន្តិសុខនៅក្នុងភូមិ ត្រង់ថា ទីតាំងល្បែងជល់មាន់ ដែលស្ថិតនៅ ភូមិតាព្រះ ឃុំព្រែកតាសរ ស្រុកពោធិ៍រៀង ខេត្ដព្រៃវែង បាននឹងកំពុងបើកលេងរាល់ថ្ងៃ ។
មហាជនសូមណូមពរដល់ឯកឧត្ដម ឧត្ដមសេនីយ៍ទោ ស្នងការខេត្ដព្រៃវែង មានវិធានការបង្ក្រាបករណីល្បែងជល់មាន់ ដែលមានទីតាំងខាងលេីនេះផងទាន ព្រោះថាចោលួចចោប្លន់.ល.កេីតចេញពីល្បែងសុីសងនេះហេីយ។
ពាក់ព័ន្វរឿងល្បែងសុីសងខាងលើនេះលោក ជា វាស្នា អធិការស្រុកពោធិ៍រៀង បានប្រាប់ឲ្យដឹងថា លោកហ្នឹងឱ្យកម្លាំងប៉ុស្តិ៍ចុះទៅមើល ៕
