ភ្នំពេញ ៖ ប្រជាពលរដ្ឋ ជាច្រើនគ្រួសារ រស់នៅក្នុងភូមិថ្មគោល ២ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ បានកើតទុក្ខមិនសុខចិត្ត ចំពោះទីតាំងអាជីវកម្ម ស្តុកមាន់ទុកកាប់យកសាច់លក់ ដែលមានម្ចាស់ទីតាំងមាន ឈ្មោះ សុីម សុខ ដែលបាននិងកំពុង បង្កផលប៉ះពាល់យ៉ាងខ្លាំងដល់ការរស់នៅរបស់ពួកគាត់សព្វថ្ងៃ។
ពលរដ្ឋបានប្រាប់មកអង្គភាពសារព័ត៌មានតាមទូរស័ព្ទថា ម្ចាស់អាជីវកម្មស្តុកសត្វមាន់នេះ ក្នុងមួយយប់ៗ បានកាប់មាន់ បង្កជាសំឡេងរំខាន់ស្រែកខ្លាំងៗ និងមានធុំក្លិនស្អុយ ដែលធ្វើឲ្យពួកគាត់មានការពិបាកក្នុងការរស់ប្រចាំថ្ងៃ ជាពិសេសផ្លូវដង្ហើមតែម្តង។
ប្រជាពលរដ្ឋបានបន្តទៀតថា អាជីវកម្មកាប់មាន់យកសាច់លក់ខាងលើនេះ បាន បង្កផលប៉ះពាល់ជាច្រើន ដូចជា គេច្រកកាកសំណល់ក្នុងថង់ប្លាស្ទីកទុកចោលមុខទីតាំង ធ្វើដូចជាសំរាមធម្មតា ហើយនៅពេល ដែលរថយន្តដឹកសំរាមមានការខនខាន មិនបានមកប្រមូលសំរាម ធ្វើឲ្យកាកសំណល់ទាំងនោះ ជះក្លិនស្អុយអសោច ពោលគឺម្ចាស់អាជីវកម្ម មិនមានកន្លែងស្តុក កាកសំណល់ឲ្យបានត្រឹមត្រូវ ដោយបោះចោល កាកសំណល់ពាសពេញទីតាំង បណ្តាលឲ្យកើតជាក្លិនស្អុយ បណ្តាលឲ្យពួកគាត់ ដែលមាននៅក្បែរ ទីតាំងនោះ ពិបាកនឹងទ្រាំ ហើយក្រៅពីក្លិនស្អុយក៏នៅមានសម្លេង មាន់ស្រែកខ្លាំងៗរំខានការ ដេកពួនពេលយប់ទៀតផង។
ប្រជាពលរដ្ឋបានឲ្យដឹងទៀតថា កន្លងមកពួកគាត់ បានប្តឹងទៅអាជ្ញាធរសង្កាត់ និងស្ថាប័នពាក់ព័ន្ឋ ឲ្យជួយ ធ្វើអន្តរាគមន៍ ក្នុងករណី នេះផងដែរ។ ប៉ុន្តែរហូតមក ដល់ពេលនេះ ទាំងអាជ្ញាធរ មូលដ្ឋាន និងស្ថាប័នពាក់ព័ន្ធ ទាំងនោះមិនមានវិធានការ យ៉ាងណាចំពោះទីតាំងកាប់ មាន់ដែលធ្វើឲ្យប៉ះពាល់ដល់បរិស្ថាន ខូចសុខភាពប្រជា ពលរដ្ឋជិតខាង។ ផ្ទុយទៅវិញ អាជីវកម្មពិឃាតសត្វមាន់ យកសាចនេះ រឹតតែពង្រីក សកម្មភាពឲ្យកាន់តែខ្លាំងក្លា ថែមទៀតពីមួយថ្ងៃទៅមួយ ថ្ងៃ។
ប្រជាពលរដ្ឋបានសូមសំណូមពរ ដល់ស្ថាប័នពាក់ព័ន្ធ អាជ្ញាធរមូលដ្ឋាន ចុះមក ពិនិត្យ និង បញ្ឈប់អាជីវកម្ម ឬមានវិធាន ការរុះរើទីតាំងកាប់មាន់ ខាងលើនេះ ទៅនៅកន្លែង ណាមួយឆ្ងាយពីទីប្រជុំជន ឬទៅនៅជាយក្រុង ដើម្បីកុំឲ្យ ប៉ះពាល់សុខភាពរបស់ពួកគាត់ដែលរស់នៅជុំវិញកន្លែងនោះ ។
ពាកព័ន្ធនឹងករណីនេះផងដែរ លោក វ៉ា សារ៉ង ចៅសង្កាត់ចោមចៅទី២ បានប្រាប់សារព័ត៌មានក្នុងស្រុក នៅថ្ងៃទី១៩ ខែសីហា ឆ្នាំ២០២០១ នេះថាលោកនឹងចុះទៅពិនិត្យនៅថ្ងៃស្អែក ៕
