ខេត្ដកំពង់ចាម៖ លោកស្រី ងួន គីថារី ហៅស្រីនិច្ច ម្ចាស់ផ្សារសំបូរ (ហៅផ្សាររុងរឿង) ទីតាំងស្ថិតនៅភូមិសំបូរ ឃុំសំបូរស្រុកបាធាយ ខេត្តកំពង់ចាម កំពុងរងការរិះគន់ និងបណ្តឹងពីពលរដ្ឋដែលរស់នៅជុំវិញថា បង្កើតផ្សារដោយមិនខ្វល់ខ្វាយពីបញ្ហាបរិស្ថាន គ្មានអនាម័យ ផ្សារសាងសង់ឡើងខុសច្ចេកទេស គ្មានច្បាប់ទម្លាប់ គ្មានអាជ្ញាបណ្ណ និងបង្កការប៉ះពាល់ដល់សុខភាពប្រជាពលរដ្ឋយ៉ាងធ្ងន់ធ្ងរ ទៀតផង។
ពលរដ្ឋបានដាក់ការសង្សយ័ថា ថាទំនងជាមានការគប់គិតគ្នាជាមួយអាជ្ញាធរនិងសមត្ថកិច្ចពាក់ព័ន្ធអស់ហើយទេដឹងឬមួយត្រូវថ្នាំសណ្ដំ បានជាបណ្ដែតបណ្ដោយឲ្យផ្សារមួយនេះបើកបានដំណើរការលក់ជារៀងរាល់ថ្ងៃ។
បើយោងតាមលិខិតជូនដំណឹងរបស់មន្ទីរបរិស្ថានខេត្តកំពង់ចាម លេខ៥៨២ ប.ស្ថ ក.ចុះថ្ងៃទី២៨ ខែតុលា ឆ្នាំ២០២២ ដែលពលរដ្ឋបានប្តឹងទៅមន្ទីរបរិស្ថានខេត្តកំពង់ចាម កាលពីថ្ងៃទី១៩ ខែសីហា ឆ្នាំ២០២២ថ្មីៗនេះ មន្ទីរបរិស្ថានខេត្ត បានស្នើឲ្យម្ចាស់ផ្សារធ្វើកិច្ចសន្យាការពារបរិស្ថាន ដោយទុករយៈពេល ៣០ថ្ងៃឲ្យជួយមើលបរិស្ថានអនាម័យ ក្នុងផ្សារសំបូរ ហៅផ្សារុងរឿង របស់លោកស្រី ងួន គីថារី ហៅស្រីនិច្ច ដែលបានបើកផ្សារលក់ដូរ យ៉ាងអាណាធិបតេយ្យ ខ្វះបច្ចេកទេសផ្នែកបរិស្ថាន អនាម័យ បង្កកសំរាម បង្កើតជាភក់ជ្រាំ ធ្វើឲ្យប៉ះពាល់ដល់សុខភាពបងប្អូនប្រជាពលរដ្ឋដែលរស់នៅជុំវិញ។
ទោះជាយ៉ាងណា លោកស្រី ងួន គីថារី និងបក្ខពួកកូនចៅ ឃើញតែដើរទារលុយថ្លៃភាសុី ថ្លៃតូប ថ្លៃអនាម័យសណ្តាប់ធ្នាប់ ជាធម្មតា តែបើការសំអាតអនាម័យវិញនោះគឺគ្មានទេ បណ្តែតបណ្ដោយឱ្យសំរាមហូរកកស្ទះលិចក្នុងផ្សារលិចផ្លូវ ក្លាយជាក្លិនស្អុយរលួយពេលភ្លៀងធ្លាក់មកម្តងៗ។
លោក ខឹម គឹម មេឃុំសំបូរ បានឲ្យដឹងថា ផ្សាររបស់លោកស្រី ងួន គីថារី គឺជាផ្សារអនាធិបតេយ្យ គ្មានច្បាប់ទម្លាប់ គ្មានអជ្ញាបណ្ណ ពោលគឺជាផ្សារសេះហោះ។
លោក ផេន សុផល អភិបាលស្រុកបាធាយ បានប្រាប់អ្នកសារព័ត៌មានយើងឲ្យដឹងថា៖ រឿងនេះលោកបានបន្តដោះហើយ ព្រោះមានហេតុច្រើន តែផ្សារចាស់នោះវាអត់មានច្បាប់ទម្លាប់មែន ហើយផ្សារថ្មីកំពុងរត់ច្បាប់ ។
ដោយឡែក លោក នួន គង់សល្យ ប្រធានមន្ទីរបរិស្ថានខេត្តកំពង់ចាម បានប្រាប់អ្នកសារព័ត៌មានយើងឲ្យដឹងថា៖ លោកបានដឹងរឿងនេះហើយ លោកក៏ធ្លាប់បានចាត់ការមួយជំហានហើយដែរ ប៉ុន្តែដោយម្ចាស់ផ្សាររូបនេះ មានចរិតមានះ អឿអួតអាងខ្លាំងពេក មិនខ្លាចរអា មិនគោរពច្បាប់ឡើយ ពោលគឺលោកស្រី ងួន គីថារី ហៅស្រីនិច្ច មិនបានសហការជាមួយនឹងមន្ត្រីជំនាញរបស់លោកទេ ហើយលោកនឹងសុំគោលការណ៍ទៅលោកអភិបាលខេត្តចាត់ការបន្តពីបញ្ហានេះ។
ជុំវិញករណីខាងលើនេះដែរអង្គភាពផ្សារព័ត៌មានយើងមិនអាចសុំការបំភ្លឺពីលោកស្រីងួន គីថារី ហៅស្រីនិច្ចបាននៅឡើយទេ ។
យ៉ាងណាក្តី ចំពោះករណីខាងលើនេះ ពលរដ្ឋទទូចស្នើសុំ ដល់ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម មេត្តាចាត់វិធានការ បញ្ជូនមន្ត្រីជំនាញចុះស្រាវជ្រាវ ចំពោះផ្សារសំបូរហៅផ្សាររុងរឿងរបស់លោកស្រី ងួន គីថារី ហៅស្រីនិច្ច ទីតាំងនៅភូមិសំបូរ ឃុំសំបូរ ស្រុកបាធាយ ពលរដ្ឋសង្ឃឹមជឿជាក់យ៉ាងមុតមាំទៅលើឯកឧត្តមអ៊ុន ចាន់ដា អភិបាលខេត្តកំពង់ចាមដែលលឯកឧត្តម តែងតែដោះស្រាយជូនប្រជាពលរដ្ឋរាល់បញ្ហានានាប្រឈមកន្លងមកនៅក្នុងខេត្តកំពង់ចាម ។
អង្គភាពសារព័ត៌មានយើងនិងរង់ចាំធ្វើការផ្សាយជាបន្តបន្ទាប់ទៀតប្រសិនបើមានការពន្យល់ឬបកស្រាយពីអាជ្ញាធរនិងសមត្ថកិច្ចពាក់ព័ន្ធឬសមុីភាគីពាក់ព័ន្ធរៀងរាល់ម៉ោងធ្វើការ ៕
