(ឧត្តរមានជ័យ) រថយន្តសេរីទំនើប១គ្រឿងRX300 បើកបរដោយព្រះសង្ឃចំនួន០២អង្គ បានរ៉េចង្កូតធ្លាក់ផ្លូវក្រឡាប់ជាច្រើនត្រឡប់បណ្តាលឲ្យរបួសធ្ងន់ធ្ងរ និងបានជួយអន្តរាគមន៏ពីសមត្ថកិច្ចមូលដ្ធានដឹកព្រះសង្ឃយកទៅសង្គ្រោះនៅមន្ទីរពេទ្យបង្អែកស្រុកអន្លង់វែង ជាក់ស្តែងដោយក្នុងនោះមានព្រះសង្ឃ១អង្គដោយស្ថានភាពជំងឺធ្ងន់ពេក ក៏ដឹកបញ្ជូនទៅសង្គ្រោះបន្ទាន់នៅមន្ទីរពេទ្យខេត្តសៀមរាបនៅថ្ងៃទី១៨ ខែកក្កដា ឆ្នាំ២០២៣នេះ ចំពោះរថយន្តរងការខូតខាតរថយន្តយ៉ាងដំណុំ។
ហេតុការនេះបានកើតឡើងនៅថ្ងៃទី១៥ ខែកក្កដា វេលាម៉ោង១៥ និង៣០នាទី ស្ថិតនៅត្រង់ចំណុចផ្លូវក្រាលគ្រួសក្រហមមួយកន្លែងក្នុង ភូមិអូរគគីកណ្តាល ឃុំលំទង ស្រុកអន្លង់វែង ខេត្តឧត្តរមានជ័យ។
លោកវរសេនីយ៏ត្រី តឹក សារឿន មេបញ្ជាការកងរាជអាវុធហត្ថស្រុកអន្លង់វែងបានប្រាប់ឲ្យដឹងនៅថ្ងៃទី១៨ ខែកក្កដា នេះថា ករណីគ្រោះថ្នាក់ចរាចរណ៏នេះ បង្ករឡើងដោយ រថយន្តទេសចរណ៏ធុនតូចបើកបរក្រឡាប់ខ្លួនឯង ក្នុងទិសដៅពីជើងទៅត្បូង បណ្តាលឲ្យព្រះសង្ឃរងរបួសធ្ងន់០១ អង្គ និងរបួសស្រាល០១អង្គ។
រថយន្តក្រឡាប់ម៉ាក LEXUS RX 330 ពណ៍ប្រផេះ សេរីផលិតឆ្នាំ២០០៥ ពាក់ស្លាកលេខ ភ្នំពេញ 2W – 6115 បើកបរដោយព្រះសង្ឍព្រះនាម ពៅ យូរី ព្រះជន្ម ៣៣ព្រះវស្សា គង់នៅវត្តអូរគគីមង្គល ស្ថិតក្នុងភូមិអូរគគីកណ្តាល ឃុំលំទង ស្រុកអន្លង់វែង ខេត្តឧត្តរមានជ័យ (រងរបួសធ្ងន់) រួមដំណើរដោយព្រះសង្ឃ១អង្គទៀតព្រះនាម ឡេង សីហា ព្រះជន្ម២៩ ព្រះវស្សា គង់នៅវត្ត សារ៉ាវ័ន្តតេជោ ស្ថិតក្នុងរាជធានីភ្នំពេញ (រងរបួសស្រាល)។
បើយោងតាមរបាយការណ៏របស់សមត្ថកិច្ចជំនាញចរាចរណ៏ មូលហេតុនៃគ្រោះថ្នាក់ចរាចរណ៍ខាងលើ បណ្តាលមកពីប្រើប្រាស់ល្បឿនលឿនជ្រុលពេក។
បច្ចុប្បន្ន ក្រោយកើតហេតុរថយន្តត្រូវបានសមត្ថកិច្ចជំនាញចរាចរណ៏ស្រុកធ្វើកំណត់ហេតុប្រគល់ទៅក្រុមគ្រួសារសាច់ញាតិព្រះសង្ឃយកចូលយានដ្ធាន ដើម្បីធ្វើការជួសជុលតែម្តង៕ដោយប៊ុនថេត.ឧត្តរមានជ័យ
