(ឧត្តរមានជ័យ) ក្រុមប្រឹក្សាភិបាលនិងក្រុមប្រឹក្សាវិន័យជាច្រើននាក់ បានចុះត្រួតពិនិត្យតាមតូបលក់ចំណីអាហារគ្រប់ប្រភេទក្នុងបរិវេណនៃសាលារៀន(វិទ្យាល័យតេជោសែនសំរោង) ក្រុងសំរោង ខេត្តឧត្តរមានជ័យ និងបានធ្វើការអប់រំណែនាំបន្ថែម ការមិនអនុញ្ញាតឬហាមឃាត់ដាច់ខាតមិនឱ្យលក់ដូររាល់មុខទំនិញណាដែលខូតគុណភាពឬផុតកំណត់កាលបរិច្ឆេទប្រើប្រាស់។
យោងតាមប្រភពពីកញ្ញា រុន កញ្ឆានា ជាប្រធានក្រុមប្រឹក្សាយុវជននិងកុមារ និងសិស្សរៀនថ្នាក់ទី១១B នៃវិទ្យាល័យតេជោសែនសំរោង តំណាងឱ្យក្រុមប្រឹក្សាវិន័យបានរៀបរាប់ប្រាប់ឱ្យដឹងនៅថ្ងៃទី១៨ ខែកក្កដា ឆ្នាំ២០២៣នេះ ៖ ការដឹកនាំរបស់ក្រុមប្រឹក្សាវិន័យ ត្រូវចុះធ្វើការអប់រំទៅដល់អាជីវករលក់ដូរនៅក្នុងបរិវេណវិទ្យាល័យតេជោសែនសំរោង គឺធ្វើឡើងជារៀងរាល់១ខែម្តងដោយមានការដាក់បទបញ្ជាជាប្រចាំផ្ទាល់ពីលោក គី ចន្នី នាយកវិទ្យាល័យតេជោសែនសំរោង ខេត្តឧត្តរមានជ័យ។
ក្រុមប្រឹក្សាវិន័យដដែលបានអះអាងបន្តថា៖ ការចុះត្រួតពិនិត្យតូបលក់ចំណីអាហារនិងហាមឃាត់មិនឱ្យលក់ក្នុងគ្រឹះស្ថានសិក្សានៃវិទ្យាល័យតេជោសែនសំរោង មានចំនួន៦ប្រភេទដូចជា
ទី១/ចំណីអាហារគ្រប់ប្រភេទដែលហួសកំណត់កាលបរិច្ឆេទ។
ទី២/គ្រឿងស្រវឹងនិងផលិតផលថ្នាំជក់គ្រប់ប្រភេទ។
ទី៣/ចំណីអាហារដែលមិនមានប្រភពច្បាស់លាស់( ប្រហិតណែមសាច់មាន់ សាច់ជ្រូកគ្រឿងសមុទ្រ គ្រប់ប្រភេទ។ល។)
ទី៤/ភេសជ្ជៈប៉ូវកម្លាំង ភេសជ្ជៈផ្អែមខ្លាំង កាហ្វេ ការ៉េម ទឹកស៊ីរ៉ូគ្រប់ប្រភេទ។
៥/ស្ករសូកូឡា ស្ករគ្រាប់ និងស្ករកៅស៊ូគ្រប់ប្រភេទ។
ទី៦/ចាហួយគ្រប់ប្រភេទនំដូណាត់ នំផ្អែមខ្លាំង។
បើយោងតាមការបញ្ជាក់ពីលោក គី ចន្នី នាយកវិទ្យាល័យតេជោសែនសំរោង ខេត្តឧត្តរមានជ័យ បានឱ្យដឹងនៅថ្ងៃទី១៨ ខែកក្កដា ឆ្នាំ២០២៣នេះថា៖ ការដាក់បទបញ្ជាផ្ទៃក្នុងរបស់សាលារៀន ជារៀងរាល់ខែនិងបង្កើតជាក្រុមការងារប្រឹក្សាវិន័យចុះត្រួតពិនិត្យអប់រំណែនាំទៅដល់ក្រុមអាជីវករលក់ដូរនៃបរិវេណសាលានេះ គឺជំរុញដើម្បីឱ្យមានការចូលរួមទប់ស្កាត់នូវការលក់ដូរចំណីអាហារខូតគុណភាពឱ្យសិស្សញ៉ាំធ្វើឱ្យប៉ះពាល់ដល់សុខភាពជាដើម។
លោក គី ចន្នី នាយកវិទ្យាល័យតេជោសែនសំរោងបានលើកឡើងបន្តថា៖ ចំពោះអាជីវករលក់ចំណីអាហារឱ្យសិស្សនៅក្នុងសាលាទាំងអស់ ប្រសិនបើក្រុមប្រឹក្សាវិន័យចុះអប់រំណែនាំរួចហើយ មិនចូលរួមសហការ នៅពេលណាក្រុមប្រឹក្សាភិបាល ឬក្រុមប្រឹក្សាវិន័យនឹងរកឃើញថា យកចំណីដែលបានហាមឃាត់ផុតកំណត់កាលបរិច្ឆេទមកលក់ឱ្យសិស្ស ក្នុងនាមលោកជានាយកសាលានឹងកោះហៅអាជីវករដែលមិនអនុវត្តន៍តាមការណែនាំរបស់សាលា ដោយហៅមកធ្វើកិច្ចសន្យាបញ្ឈប់លែងឱ្យលក់ដូរបន្តទៀតនៅក្នុងបរិវេណសាលាដាច់ខាតមិនលើកលែងឱ្យឡើយ។
សូមបញ្ជាក់ថា បើយោងតាមការលើកឡើងពីលោកនាយកវិទ្យាល័យតេជោសែនសំរោង បានប្រាប់បន្តថា៖ ចំពោះការលក់ដូររបស់អាជីវករទាំងអស់គឺអនុញ្ញាតិឱ្យលក់ចំណីណាដែលគុណភាព ដូចជា លក់បាយ គុយទាវ បបរ នំបុ័ង នំបញ្ចុកសម្លរខ្មែរ នំអន្សម បង្អែមខ្មែរ នំក្រូច នំពុំ នំគ្រក់ជាដើម ដោយឡែកសិស្សរៀនជាក់ស្តែងមានចាប់ពីថ្នាក់ទី៧ដល់ថ្នាក់ទី១២ដែលមានចំនួនសរុប១៨៤២នាក់ក្នុងនោះសិស្សស្រី៩៥២នាក់ផងដែរ។ ដោយលោក ប៊ុន ថេត.ឧត្តរមានជ័យ.១៨.០៧.២០២៣
