ព្រះសីហនុ៖កម្លាំងអធិការដ្ឋាននគរបាលស្រុកស្ទឹងហាវ បានបង្ក្រាបមុខសញ្ញាចែកចាយថ្នាំញៀន តាមរថយន្តធុនធំតែពេលដេញបង្ក្រាបនោះ មុខសញ្ញាបានលោតចុះពីរថយន្ត ហើយរត់គេចខ្លួនពួនក្នុងព្រៃ នៅមិនទាន់រកឃើញនៅឡើយ។
ហេតុការនេះបានកេីតឡេីងកាលពីវេលាម៉ោង៩ ព្រឹក ថ្ងៃទី១២ មិថុនា ២០១៩ដែរស្កិតនៅក្នុងភូមិ១ ឃុំទំនប់រលក ស្រុកស្ទឹងហាវ ខេត្តព្រះសីហនុ។
លោកវរសេនីយ៍ឯក រស់ កី អធិការនគរបាលស្រុកស្ទឹងហាវ បានឲ្យដឹងថា មុខសញ្ញាលក់ចែកចាយគ្រឿងញៀនតាមរថយន្តធុនធំនេះ សមត្ថកិច្ចជំនាញ បានតាមដានឃ្លាំមើលយូរមកហើយ លុះដល់វេលាម៉ោងដូចខាងលើ ពេលសមត្ថកិច្ចឃាត់រថយន្តបំរុងឆែកឆេរ ស្រាប់តែមុខសញ្ញាបានបើករថយន្តធុនធំ យ៉ាងលឿនដើម្បីគេចខ្លួន សមត្ថកិច្ចបានសំរេចប្រើអាវុធបាញ់បំបែកកង់មុខតែម្តង ពេលរថយន្ដត្រូវបានបញ្ឈប់ល្បឿន អ្នកបើកបរបានលោតចុះ ហើយរត់គេចខ្លួនចូលទៅក្នុងព្រៃ បាត់ទៅ។
ពេលនោះកម្លាំងជំនាញក៏បានដេញតាមរក នៅក្នុងព្រៃនោះដែរ ប៉ុន្តែជនសង្ស័យនោះ បានគេចខ្លួនបាត់ទៅហើយ កម្លាំងជំនាញនៅតែខិតខំស្វែងរករហូតដល់វេលម៉ោង១៤:០០នាទី នៅតែរកមិនឃើញ។
បន្ទាប់មកកម្លាំងជំនាញ ធ្វើការឆែកឆេរក្នុងរថយន្ត បានរកឃើញវត្ថុតាងមួយចំនួនមាន១,ម្សៅក្រាមពណ៍សថ្លាសង្ស័យថាជាសាធាតុញៀនចំនួន ១០កញ្ចប់តូច ២,ឧបករណ៍សំរាប់ជក់គ្រឿងញៀនមួយចំនួន និងឯកសារអត្តសញ្ញាណ័បណ្ណសញ្ជាតិខ្មែរ ប័ណ្ណបើកបរ ជារបស់ ជនសង្ស័យមាន ឈ្មោះមុិច ចន្ថា ភេទប្រុស អាយុ៣២ឆ្នាំ មានស្រុកកំណើត នៅ ឃុំមហាសាំង ស្រុកភ្នំស្រួច ខេត្តកំពង់ស្ពឺ មុខរបរបើកបររថយន្ត៕ដោយ៖លោកសំនៀង
