បន្ទាយមានជ័យ ៖ ស្ត្រីម្នាក់បានស្លាប់បាត់បង់ជីវិតយ៉ាងអាណោចអាធម្ម ដោយសារគ្រោះធម្មជាតិរន្ទះបាញ់
ហេតុការណ៍គួរអោយរន្ធត់នេះ បានកើតឡេីងនៅវេលាម៉ោង ៤ល្ងាច ថ្ងៃទី១២ ខែមិថុនា ឆ្នាំ២០១៩ ចំណុចចំការដំឡូងមី (កញ្ចន់ប្ញស្សី) ខាងលិចភូមិគោកព្រេច ចម្ងាយ ១,០០០ម៉ែត្រ ស្ថិតក្នុងភូមិគោកព្រេច ឃុំគោករមៀត ស្រុកថ្មពួក ខេត្តបន្ទាយមានជ័យ ។
តាមប្រភពព័ត៌មាន ពីនគរបាលមូលដ្ឋាន បានឲ្យដឹងថា ស្ត្រីរងគ្រោះ ឈ្មោះ រ៉ាត់ មុំ ភេទស្រី អាយុ ៣៤ឆ្នាំ រស់នៅភូមិឃុំកេីតហេតុ ។
ប្រភពដដែលបានបន្ដថា នៅមុនពេលកើតហេតុផ្ទៃមេឃមានធ្លាក់ភ្លៀងស្រិចៗ លាយឡំជាមួយនឹងផ្គររន្ទះយ៉ាងខ្លាំង ស្របពេលនោះជនរងគ្រោះ និងប្តីកំពុងតែជម្រះស្មៅដំឡូងមី ដែលគាត់បានប្រវ៉ាស់ដៃគ្នា(ចូលដៃគ្នាថ្ងៃនេះជម្រះស្មៅចម្ការ ស្អែកគេនឹងមកជួយជម្រះស្មៅឲ្យវិញ) ពេលកំពុងតែជម្រះស្មៅក្នុងចម្ការជាមួយអ្នកចម្ការនៅភូមិជាមួយគ្នា ក៏ស្រាប់តែរន្ទះបានបាញ់ស្ត្រីរងគ្រោះ បណ្តាលឲ្យស្លាប់ភ្លាមៗនៅនឹងចម្ការ ។
សពជនរងគ្រោះត្រូវបានដឹកយកមកផ្ទះ ដេីម្បីធ្វេីការពិនិត្យ ដែលមានលោកមេភូមិ និងគ្រូពេទ្យ ព្រមទាំងប្រជាពលរដ្ឋ ចូលរួមផងដែរ ។
ក្រោយពិនិត្យរួចឃេីញថា សពជនរងគ្រោះមានឆេះអាវ ខ្លួនជនរងគ្រោះក៏មានខ្មៅជាំ ដូច្នេះជនរងគ្រោះ គឺពិតជាស្លាប់ដោយសាររន្ទះបាញ់ប្រាកដមែន រួចសពត្រូវបានប្រគល់ជូនក្រុមគ្រួសារចាត់ចែងធ្វើបុណ្យតាមប្រពៃណី៕
