បន្ទាយមានជ័យ៖ក្នុងប្រតិបត្តិការបង្ក្រាបកាស៊ីណូឡាក់គី ស្ថិតនៅក្រុងប៉ោយប៉ែត កាលពីរសៀលថ្ងៃម្សិលមិញ បានឃាត់ខ្លួនមនុស្សចំនួន១៥៥នាក់ ដោយក្នុងនោះស្រី២នាក់ និងរឹបអូសបានវត្ថុតាងគ្រឿងញៀនជាច្រើនប្រភេទ។
លោកវរៈសេនីយ៍ឯក ធិន ស៊ិនដេត អធិការនគរបាលក្រុងប៉ោយប៉ែតបានឲ្យដឹងនៅព្រឹកថ្ងៃទី១៩ ខែមិថុនា ឆ្នាំ២០១៩ថា ប្រតិបត្តិការបង្ក្រាបកាស៊ីណូយីហោឡាក់គី ក្នុងក្រុងប៉ោយប៉ែត គឺចាប់ផ្តើមពីម៉ោង៣ និង៣០នាទីរសៀលថ្ងៃទី១៨ ខែមិថុនា រហូតដល់យប់រំលងអធ្រាត្រឈានចូលថ្ងៃទី១៩ ខែមិថុនា ឆ្នាំ២០១៩ ដោយបានឃាត់ខ្លួនជនសង្ស័យជាបន្តបន្ទាប់នៅក្នុងបរិវេណកាស៊ីណូឡាក់គីសរុបចំនួន១៥៥នាក់ ព្រមរឹបអូសវត្ថុតាងមានគ្រឿងញៀនជាច្រើនប្រភេទ រួមមាន មេតំហ្វេតាមីនប្រភេទគ្រាប់ ហៅយ៉ាម៉ា និងម្ស៉ៅពណ៌សផ្លាហៅខេទឹកកក និងថ្នាំទឹកជាប្រភេទថ្នាំក្រវី ព្រមទាំងវត្ថុតាងជាច្រើនទៀត រាល់វត្ថុតាងទាំងនោះត្រូវបានបញ្ជូនទៅស្នងការដ្ឋាននគរបាលខេត្តបន្ទាយមានជ័យទាំងកណ្តាលយប់។
លោកវរៈសេនីយ៍ទោ ង៉េង សុជា ស្នងការរងទទួលផែនប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តបន្ទាយមានជ័យបានថ្លែងថា ជនសង្ស័យដែលឃាត់ចំនួន១៥៥នាក់ គឺមានសន្តិសុខកាស៊ីណូ មេការកាស៊ីណូ និងបុគ្គលឹកកាស៊ីណូ និងជនល្មើសជួញដូរ ចែកចាយ និងប្រើប្រាស់គ្រឿងញៀន បច្ចុប្បន្នកំពុងត្រូវធ្វើការសាកសួរដើម្បីចាត់ការតាមនីតិវិធី៕
