ក្រចេះ៖ ផ្ទះប្រជាពលរដ្ឋ២ខ្នង ត្រូវបានអគ្គិភ័យឆាបឆេះអស់ទាំងស្រុងតែម្តង កាលពីវេលាម៉ោង២និង៣០នាទីយប់រំលងអាធ្រាត ឈានចូលថ្ងៃទី៣ កក្កដា ឆ្នាំ២០១៩ នៅចំណុចភូមិក្បាលស្នួល ឃុំស្នួល ស្រុកស្នួល ខេត្តក្រចេះ។
បេីតាមប្រភពពីកន្លែងកេីតហេតុបានអោយដឹងថាមានករណីអគ្គិភ័យមួយ បានឆាបឆេះផ្ទះប្រជាពលរដ្ឋ នៅស្រុកស្នួល ខេត្តក្រចេះ នៅវេលាម៉ោង២និង៣០នាទីយប់ជ្រៅ នៅចំណុចភូមិក្បាលស្នួល ឃុំស្នួល ស្រុកស្នួល ខេត្តក្រចេះ អស់ផ្ទះចំនួន២ខ្នងឆេះរាបដល់ដី។
ប្រភពបានបន្តឲ្យដឹងថា ដោយសារតែអណ្តាតភ្លើងឆាបឆេះ មានសភាពខ្លាំងក្លា ឆាបឆេះលឿនខ្លាំងពេក ទើបធ្វើឲ្យមានលំបាកក្នុងការពន្លត់ឲ្យទាន់ពេល ហើយកម្លាំងអន្តរាគមន៍ពន្លត់អគ្គីភ័យ ក៏ទៅមិនទាន់ដែរ ព្រោះតែយប់ជ្រៅពេក។
ជាមួយគ្នានោះដែរ ខណះអគ្គិភ័យកំពុងឆាបឆេះខ្លាំង ក៏មានវត្តមាន លោក ចាន់ សុគីម បានដឹកនាំកងកំលាំងអធិកាស្រុកស្នួល ដោយផ្ទាល់ជួយពន្លត់អគ្គិភ័យនោះផងដែរ តែសោកស្តាយ ដោយមិនអាចគ្រប់គ្រងស្ថានការណ៍បាន ទើបធ្វើឲ្យព្រះអគ្គី លេបត្របាក់អស់ទាំងស្រុងបាត់ទៅហើយ៕
