ភ្នំពេញ៖កម្លាំងការិយាល័យប្រឆាំងការជួញដូរមនុស្ស និងការពារអនីតិជន ដឹកនាំដោយលោកស្រី ស៊ឺ វណ្ណ នី ព្រះរាជអាជ្ញារងអមសាលាដំបូងរាជធានីភ្នំពេញ លោកឧត្តមសេនីយ៍ទោ ចាន់ កិត្តិខុម ស្នងការរងទទួលដឹកនាំការងារការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលរាជាធានីភ្នំពេញ បានចុះបង្ក្រាបជាក់ស្តែងករណីប្រព្រឹត្តិអំពើសញ្ចារកម្ម មានស្ថានទម្ងន់ទោស (នាំ នារីក្មេងៗឱ្យរួមភេទជាមួយភ្ញៀវនៅតាមផ្ទះសំណាក់ និងសណ្ឋាគារ) ដោយបានឃាត់ខ្លួនមនុស្សចំនួន ០៦នាក់ នៅវេលាម៉ោង ២នឹង៣០នាទី ថ្ងៃទី០៥ ខែកក្កដា ឆ្នាំ២០១៩។
សមត្ថកិច្ចបានឱ្យដឹងថាឈ្មោះ ខន ចាន់ណាវី ភេទស្រី អាយុ ២២ឆ្នាំ ជនជាតិខ្មែរ ជាមេខ្យល់ និងជនរងគ្រោះ ០៥នាក់ អនីតិជន ០៣នាក់ ដែលស្ថិតនៅចំណុចភោជនីយ៍ដ្ឋាន ឈូករ័ត្ន ម្ហូបខ្មែរ ផ្លូវលេខ១៩៨៦ សង្កាត់ភ្នំពេញថ្មី ខណ្ឌសែនសុខ (ឃាត់ខ្លួន ០៣នាក់) និងនៅចំណុចផ្ទះសំណាក់ ស្រែ ផល ផ្លូវបេតុង សង្កាត់អូរបែកក្អម ខណ្ឌសែនសុខ (ឃាត់ខ្លួន ០៣នាក់)។
បច្ចុប្បន្នសមត្ថកិច្ចកំពុងសាកសួរ និងកសាងសំណុំរឿង ចាត់ការជនសង្ស័យខាងលើទៅកាន់តុលាការតាមនីតិវិធីច្បាប់ជាធរមាន៕
