ខេត្តស្វាយរៀង៖មន្ត្រីនគរបាលអន្តោរប្រវេសន៍មាត់ច្រកទ្វារព្រំដែនអន្តរបាវិតនៅព្រឹកថ្ងៃទី២០ខែកក្កដាឆ្នាំ២០១៩នេះបានធ្វើការ សហការជាមួយបសុពេទ្យប្រចាំការច្រកទ្វារនិងមន្ត្រីកសិកម្មក្រុងបាវិតបានឃាត់ជនជាតិវៀតណាមដឹកសាច់ជ្រូកខុសច្បាប់ពី វៀតណាមចូលមកកម្ពុជានូវសាច់សុទ្ធចំនួន៦០គីឡូក្រាមនៅត្រង់ចំណុចមាត់ច្រកទ្វារអន្តរជាតិបាវិត រួចដុតកំទេចចោលនៅបរិវេណមាត់ច្រកទ្វារព្រំដែនអន្តរជាតិបាវិតតាមនីតិវិធីបសុពេទ្យ។
តាមប្រសាសន៍របស់លោកវរសេនីយ៍ឯក ដេវ សុិនហុង នាយរងប៉ុស្តិ៍ច្រកទ្វារព្រំដែនអន្តរជាតិបាវិតបានឱ្យដឹងថា ចំពោះសាច់ជ្រូកដែលសមត្ថកិច្ចយើងធ្វើការដុតកំទេចចោលចំនួន៦០គីឡូក្រាមនៅព្រឹកនេះគឺបានដកហូតពីម៉ូតូឌុបជនជាតិវៀតណាមដែលបានដឹកឆ្លងកាត់មាត់ច្រកទា្វរព្រំដែនអន្តរជាតិបាវិតដោយមិនអនុញាតឱ្យចរាចរណ៍សាច់ជ្រូកឆ្លងកាត់ចូលមកក្នុងព្រះរាជាណាចក្រកម្ពុជានោះទេជៀសវាងខ្លាចបង្កផលប៉ះពាល់ទៅដល់សុវត្ថិភាពចំណីអាហារជាពិសេសគឺករណីជំងឺប៉េស្តជ្រូកអាហ្វ្រិកនិងអនុវត្តទៅតាមការណែនាំរបស់ថ្នាក់ដឹកនាំនិងផ្នែកដែលមានការពាក់ព័ន្ធ។
លោកនាយរងប៉ុស្តិ៍បានបន្តទៀតថា សាច់ជ្រូកត្រូវបានធ្វើការដកហូតយកទៅធ្វើការកំទេចចោលដោយឡែកម៉ូតូឌុបដែលបានដឹកសាច់ជ្រូកនោះសមត្ថកិច្ចយើងបានហៅមកធ្វើកិច្ចសន្យាបញ្ឈប់លែងឱ្យនាំសាច់ជ្រូកចូលមកទៀតព្រមទាំងបានធ្វើការបណ្តេញចេញពីព្រះរាជាណាចក្រកម្ពុជាទៅតាមនីតិវិធីផងដែរ៕ដោយ៖ជា រដ្ឋា
