បន្ទាយមានជ័យ៖ប្រជាពលរដ្ឋ០១នាក់បានដាច់ជើងទាំងពីរខណៈគាត់ចូលទៅដាក់អន្ទាក់សត្វ ក្នុងព្រៃចំការមីន ខាងលិចទំនប់ក៥តំបន់ព្រំដែនមិនទាន់ច្បាស់លាស់មុខភូមិសាស្ត្រ ភូមិទំនប់ដាច់ ឃុំអូរបីជាន់ ស្រុកអូរជ្រៅហើយជាន់មីនតែម្តង។
តាមប្រភពព័ត៌មានបានរាយការណ៍អោយដឹងថា ក្រោយទទួលដំណឹងភ្លាមនៅវេលាម៉ោង១៥:១០នាទី លោក អនុសេនិយ៍ឯកប៉ាក់ សារ៉ាត់ នាយប៉ុស្តិ៍ការពារព្រំដែនគោក សិលាខ្មែរ នៃវរសេនាតូចនគរបាលការពារព្រំដែនគោកលេខ៩១១ បានដឹកនាំកម្លាំង សហការជាមួយកម្លាំងប៉ុស្តិ៍រដ្ឋបាលអូរបីជាន់ និងកម្លាំងយោធាចុះជួយសង្គ្រោះ។
ប្រជាពលរដ្ឋដែលរងគ្រោះ ឈ្មោះ ញ៉ែម សឹម ភេទប្រុសអាយុ៦៤ឆ្នាំរស់នៅភូមិជោគជ័យ ឃុំអូរបីជាន់ ស្រុកអូរជ្រៅខេត្តបន្ទាយមានជ័យ។ បានជួបគ្រោះថ្នាក់ដោយសារជាន់មីន បណ្តាលឲ្យរងរបួសធ្ងន់ដោយដាច់ជើងទាំងពីរ ខណៈគាត់ចូលទៅដាក់អន្ទាក់សត្វ ក្នុងព្រៃចំការមីន ខាងលិចទំនប់ក៥តំបន់ព្រំដែនមិនទាន់ច្បាស់លាស់មុខភូមិសាស្ត្រ ភូមិទំនប់ដាច់ ឃុំអូរបីជាន់ ស្រុកអូរជ្រៅ។ ជនរងគ្រោះត្រូវបានរថយន្តដឹកបញ្ជូនទៅសង្គោ្រះបន្ទាន់ នៅមន្ទីរពេទ្យបង្អែក ប៉ោយប៉ែត(ដីថ្មី) ។
